महिना

उत्सव-कार्यक्रम

चैत्र

• गुढिपाडव्यादिवशी सकाळी गुढी उभारणी त्याचे पूजन तसेच पंचांग पूजन आणि वाचन होते त्यानंतर कडुनिंबाची चटणी प्रसाद म्हणून वाटली जाते.
• वर्षप्रतिपदा ते चैत्र अमावस्येपर्यंत रात्रौ प्रवचन, आरती, पालखी प्रदक्षिणा तसेच वसंत पूजनाचे कार्यक्रम होतात.
• हनुमान जयंती पौर्णिमेला मांडात (देवालयासमोरील मोक़ळ्या भागात) होळी पौर्णिमेला उभारलेली होळी पालख़ी प्रदक्षिणा आटोपल्यानंतर तोडली जाते.

वैशाख

• विशेष कोणताही वार्षिक उत्सव नाही.

ज्येष्ठ

• ज्येष्ठ अमावस्येला देसरुढ नावाचे वार्षिक केले जाते

आषाढ

• आषाढ शुध्द त्रयोदशी ते आषाढ पौर्णिमा या तीन दिवसांच्या कालावधीत भावईचा उत्सव असतो.

श्रावण

• नारळी पौर्णिमेचा दुसरा दिवस म्हणजे श्रावण कृष्ण प्रतिपदा ते श्रावण कृष्ण अष्टमी पर्य़ंत अखंड हरीनाम सप्ताह (सात दिवस) साजरा होतो त्याची सांगता अष्टमीला रात्री श्री कृष्ण जन्म आणि दुसऱ्या दिवशी दहीकाल्याने होते.

भाद्रपद

• गणेश चतुर्थी दिवशी पुरुष मंडळी मंदीरात फुगड्या घालतात.
• सर्वपित्री अमावस्येदिवशी संध्याकाळी चारही शिवकळांचा संचार असतो यादिवशी भाविक मोठ्या संख्येने उपस्थित राहतात.

आश्विन

या महिन्यात गावचा प्रमुख ग्रामोत्सव म्हणजेच 'नवरात्रौत्सव' साजरा होतो.

अश्विन शुद्ध प्रतिपदा ते विजयादशमी (दसरा) याकालावधीत हा संस्थानिक थाटाचा शारदिय नवरात्रोत्सव पार पडतो.

या उत्सवात मंदिराचा दिनक्रम पुढील प्रमाणे असतो

• सकाळी ५ वाजता - काकड आरती
• सकाळी ६ वाजता - श्रींची षोडशोपचारी पुजा
• सकाळी ७ पासुन - मंदीर भाविकांना दर्शनाकरीता ते रात्री ९ पर्य़ंत
• सकाळी ९ ते १० - सनई वादन
• सकाळी १० ते १२ - शास्त्रीय संगिताची बैठक
• दुपारी १२ वाजता - इशारत
• संध्याकाळी ४ ते ५ - सनई वादन
• संध्याक़ाळी ५ ते ७ - शास्त्रीय संगिताची बैठक
• संध्याकाळी ७ ते ९ - स्थानिक व बाहेरील नामवंत बुवांची भजने
• रात्री ९ ते ९.३० - प्रवचन
• रात्री ९.३० ते १०.३० - पालखी प्रदक्षिणा
• रात्री १०.३० ते १०.४५ - पानसुपारी
• रात्री १०.४५ ते १२.०० - किर्तन
• रात्री १२ वाजता - श्रींचा पंचारती ताटाचा संचार

या दिनक्रमात अष्टमी दिवशी संध्याकाळी श्रींचा संचार आपल्या साजासहीत श्री देव जैन आकार ब्राह्मणाच्या भेटीला जातो. त्यानंतर श्रींच्या पंचारती ताटाची पूजा होते हे पूजन मानकरी, देवसेवक ग्रामस्थ भाविक इ. सर्वजण करतात.

नवमी दिवशी मंदीरात चंडी होम हवन होते आणि सर्व भाविकांना महाप्रसादाचे वाटप होते.

विजया दशमी म्हणजेच दसऱ्यादिवशी चारही शिवकळा आपल्या साजासहीत संस्थानिक थाटात आपटा पूजन आणि सोने लुटण्याच्या कार्यक्रम करतात.

कोजागिरी पौर्णिमेपासून त्रिपुरारी पौर्णिमेपर्यंत एक महीना रात्री प्रवचन, पालखी प्रदक्षिणा होते.

कोजागिरी पौर्णिमेला रात्री पालखी झाल्यानंतर सर्वजण श्री देव विठोबा मंदीरात दूध पिऊन कोजागिरी साजरी करतात.

कार्तिक

• या महिन्यात तुलसी विवाह होतो,
• वैकुंठ चतुर्दशीला गावघोरीप (वार्षिक नाटक) होते
• त्रिपुरारी पौर्णिमेला सर्व मंदीर परीसर पणत्यांनी सजवून दीपोत्सव साजरा केला जातो.

मार्गशीर्ष

• विशेष कोणताही वार्षिक उत्सव नाही.

पौष

• डाळपी मर्याद किंवा डाळप स्वारी हा उत्सव होतो ( पण हे त्रैवार्षिक आहे)
• श्री देवी वडची (आडिवरे वाडी ) जत्रा मोठया भक्तिभावाने साजरी केली जाते.

माघ

• विशेष कोणताही वार्षिक उत्सव नाही.

फाल्गुन

• फाल्गुन पौर्णिमेला मंदीराच्या समोरील भागात (मांडात) गाव होळी लावली जाते व पुढील पाच दिवस संपुर्ण गावात श्रींचे निशाण घरोघरी जाते.
• पाचही दिवस रात्री होळीस्थानी रखवाली तसेच नवसाचे श्रीफल अर्पण केले जाते.
• होळीच्या दुसऱ्या दिवशी सकाळी धुळवड साजरी करतात.