या संस्थानामध्ये खालील प्रमाणे मानकरी आणि देवसेवक आहेत.

मिराशी, ठाकुरगांवकर, कुलकर्णी, पोकम, घाडीगांवकर, सुतार यांचा उल्लेख प्रत्येक शिवकळा संचारानंतर सभामंडपात आल्यावर करतात. हे मान त्या त्या घरात वंशपरंपरेने पुढे चालु राहतात.

मिराशी अष्टाधिकारी समजला जातो. मंदिरातील नवरात्रोत्सवावेळी तो यजमान पद भूषवितो. एखादे वार्षिक काही कारणास्तव अडले असल्यास त्यात योग्य मार्ग काढण्याची जबाबदारी परंपरेने त्या पदाला दिलेली आहे.

कुळकर्णी हे मेळेकरी असुन लोकांची गाऱ्हाणी शिवकळेच्या कानावर घालण्याचे काम ते करतात. किंबहुना नवरात्रोत्सवातील श्रींच्या संचारासाठी गायली जाणारी आरती, “आनंद उदयो बोला ना अंबे भवानीचा” ही तेच म्हणतात.

पुर्वीच्या काळात ऍडमिनीस्ट्रेटर म्हणुन जमेदार हे पद प्रभुदेसाई घराण्याकडे आहे, देवस्थान घटनेमध्येही याच अनुषंगाने किमान एक विश्वस्त प्रभुदेसाई घराण्यातील असावा असा नियम आहे. बाकी पोकम हे श्री देव जैन आकार ब्राह्मण या स्थानचे वस आहेत, घाडीगांवकर हे श्री देव गांगेश्वर या स्थानचे वस, सुतार हे श्री देव चव्हाटा रवळनाथ याचे वस, तसेच घाडी हे पावणाई देवीचे वस असुन हे सर्व मानकरी वर्सलीप्रमाणे आपापले कामकाज करतात.

संस्थानमध्ये खालीलप्रमाणे देवसेवक आहेत :

1. श्रींचा पुजारी – ही व्यक्ती ब्राह्मण समाजातील असते. बहुतेक वेळा याच व्यक्तीवर देवीचा संचार होतो. हे पद संस्थान नियुक्त आहे. येथे कोणाचाही वंशपरंपरागत हक्क नाही.
2. पुराणिक/ग्रामोपाध्याय – ही सेवा सामान्यतः ग्रामोपाध्याय (भटकामतेकर) स्वीकारतात. नवरात्रोत्सवात ही सेवा आजुबाजूच्या गावातील काही ग्रामस्थ स्वयंस्फूर्तीने करतात. याची नियुक्ती मिराशी ठरवितो.
3. ब्राह्मणदेव वहिवाटदार – या देवस्थानची सेवा पोकम घराण्यातील व्यक्ती त्यांच्या वरसलीप्रमाणे करतात.
4. गांगेश्वर वहिवाटदार – भरडवाडीतील घाडीगांवकर समाजातील व्यक्तींकडे या देवस्थानची सेवा असते. ती ते त्यांच्या वरसलीप्रमाणे करतात.
5. रवळनाथ वहिवाटदार – या देवस्थानची सेवा देवुळवाडीतील मेस्त्री (सुतार) समाजाकडे असते. ती ते त्यांच्या वरसलीप्रमाणे करतात.
6. पावणाई वहिवाटदार – पलिकडच्या वाडीतील घाडी समाज या देवस्थानची सेवा त्यांच्या वरसलीप्रमाणे करतो.
7. वडची देवी वहिवाटदार – ही सेवा भरडवाडीतील घाडीगांवकर समाजाकडे असते. ती ते त्यांच्या वरसलीप्रमाणे करतात.
8. स्थानेश्वर वहिवाटदार – ही सेवा प्रभुदेसाई घराण्यातील व्यक्तीकडे असते.
9. हेदुबाई वहिवाटदार – या देवस्थानची सेवा खुडी गावातील घाडी समाजाकडे वरसलीप्रमाणे असते.
10. भुतेश्वर वहिवाटदार – खुडी गावातील या देवस्थानची सेवा जोईल समाजाकडे वरसलीप्रमाणे असते.
11. खांबदुरी – चार शिवकळांचे चार खांबदुरी आहेत. श्री देवी भगवतीसाठी सध्या श्रींचा पुजारी, श्री देव गांगेश्वरसाठी घाडीगांवकर, श्री देवी पावणाईसाठी घाडी तसेच श्री देव रवळनाथासाठी मेस्त्री कुटुंबातील खांबदुरी म्हणुन नेमणुक करतात.
12. मशाल – ही सेवा कोटकामते गावातील ठाकूर यांचेकडे आहे.
13. चोपदार (२) – कोटकामते गावातील म्हसकर आणि पलिकडच्या वाडीतील चव्हाण कुटुंबाकडे ही सेवा असते.
14. हुद्दा – ही सेवा मेस्त्री समाजातील व्यक्ती करतात.
15. मोरचिल – पोकम समाजातील व्यक्ती ही सेवा वरसलीप्रमाणे पार पाडतात.
16. भोई (२) - पालखी वाहून नेण्याची ही सेवा घाडी व मिशाळे दरवर्षी करतात.
17. नाईक पट्टेवाला – ही सेवा पूर्वी मुस्लीम समाजाकडे होती. त्यामुळे या पट्ट्यावर चांद-बिंदी आहे. त्यानी ती सोडल्यानंतर देऊळवाडीतील कामतेकरांनी ही सेवा स्वीकारली आहे.
18. उत्सव पट्टेवाला (४) – उभावाडा येथील चुनेकर, रुमडे (आडवलकर), हिर्लेकर कुटुंबातील व्यक्ती ही सेवा नवरात्रोत्सवांत पार पाडतात.
19. चौरी (४) – आरती सुरू असताना व पालखीसोबत चुनेकर, चव्हाण आणि ठाकूर कुटुंबातील व्यक्ती ही सेवा करतात.
20. अब्दागिर (२) – ठुकरुल आणि चुनेकर ही सेवा पालखीसोबत पार पाडतात.
21. हिलाल – कामतेकर (तेली) ही सेवा करतात.
22. कोठावळा – उत्सवासाठी संस्थानने आणलेले साहित्य उत्सवाला रीतीनुसार पुरविण्याची ही सेवा पारकर कुटुंबीयांनी स्वीकारली आहे.
23. छत्री – पालखी-प्रदक्षिणेसोबत पालखीवर छत्र धरण्याची ही सेवा मेस्त्री कुटुंबीय करतात.
24. घाम पुसणे – नवरात्रात देवीचा संचार असलेल्या व्यक्तीचा घाम पुसण्याची ही सेवा म्हसकर कुटुंबातील सदस्य करतात.
25. शंख – आरतीनंतर पालखीसोबत व देवीच्या संचारासोबत शंख फुंकण्याची सेवा नाथ-गोसावी समाजातील व्यक्तीने स्वीकारली आहे.
26. गस्त – नवरात्रोत्सवाचा त्या त्या दिवशीचा कार्यक्रम आटोपल्यानंतर कुणी अनोळखी व्यक्ती आजुबाजूच्या परिसरात नाही ना, काही धोका नाही ना याची खात्री करून घेण्याची खात्री करून घेण्यासाठी गस्त घालण्याची ही सेवा मिशाळे कुटुंबीयांनी स्वीकारली आहे.
27. निशाण (२) – पालखी-प्रदक्षिणेसोबत देवीची निशाणे घेऊन फिरण्याची ही सेवा कोकम आणि कामतेकर (परीट) कुटुंबे करतात.
28. झेंडा (५) – निशाणासोबत पालखीसोबत देवीचे झेंडेही फिरविले जातात. ही सेवा बागवे, रुमडे, सावंत, मेजारी आणि कामतेकर (परीट), या कुटुंबीयातील व्यक्ती करतात.
29. मृदंग – पाटकर कुटुंबीय ही सेवा करतात.
30. झांज – कामतेकर कुटुंबीयांनी ही सेवा स्वीकारली आहे.
31. कीर्तनकार – नवरात्रोत्सवातील ही सेवा गावातील व गावाबाहेरील नामांकित कीर्तनकार करतात.
32. पेटीवाला – गावातील व गावाबाहेरील नामांकित कलाकार ही सेवा करतात.
33. आतषबाजी – पालखी-प्रदक्षिणेच्या वेळी रंगीत फुलबाज्या रंगीत पाऊसासरखी आतषबाजी करणे ही सेवा मेस्त्री कुटुंबीय सांभाळतात. किर्तनावेळी अगरबत्तीचे झाड लावणे हे कामही मेस्त्री कुटुंबिय करतात.
34. तेल पिळणे – संचार झालेल्या देवीच्या तबकातील काकडे प्रज्वलित ठेवण्यासाठी ही सेवा मेस्त्री कुटुंबीय सांभाळतात.
35. पासरी – श्रींच्या संचाराला लागणारे तेल पासरीत घेतले जाते त्याची जबाबदारी कामतेकर (तेली) कुटुंबियांकडे आहे.
36. संपुष्टान – वरीलप्रमाणे तेल पिळण्यासाठी तेलाचे लहान भांडे सांभाळण्याची ही जबाबदारी पलिकडच्या वाडीतील घाडी कुटुंबीयांकडे असते.
37. आतील रोषणाई –नवरात्रोत्सवात सभामंडपात हंड्या-झुंबरे लावणे, देवालयाच्या आतील भागांत रोषणाई करण्याची सेवा मिशाळे करतात.
38. बाहेरील रोषणाई – देवालयाच्या बाहेरच्या बाजूने रोषणाई करण्याचे काम घाडीगांवकर सांभाळतात.
39. देवदास (२) – गर्भगृहातील सफाई आणि गोपुरी आणि सभामंडपातील दररोजची सफाई करण्याची ही सेवा पाटकर बंधु आणि कामतेकर बंधु यानी स्वीकारली आहे. (पूर्वी या कामासाठी देवदासींची नियुक्ति केलेली होती).
40. उत्सव वाजंत्री – नवरात्रोत्सवातील ही सेवा गावातील शेख कुटुंबीय सांभाळतात.
41. घटिका – नवरात्रोत्सवात घटिका बुडाली की टोल देऊन सर्व ग्रामस्थांना व देवसेवकांना वेळेची जाणीव करून देण्याची ही सेवा भरडवाडीतील घाडीगांवकर मंडळी करतात.
42. बरकंदाज –घटकेप्रमाणे कार्यक्रमाची वेळ झाली की बार काढून कार्यक्रमाचे वेळापत्रक संभाळण्याचे काम (सध्या ऍटम- बॉम्ब लावण्याची ही सेवाही) भरडवाडीतील घाडीगांवकर कुटुंबीय सांभाळतात.
43. महिरप – आगळ्या प्रकारचे मोरपिसे लावलेले हे निशाण पेडणेकर कुटुंबीय सांभाळतात.
44. श्रींचा रखवालदार – नवरात्रात देवीचे दागिने चढवून झाले की रात्री उत्सव आटोपेपर्यंत त्यांच्यावर देखरेख ठेवण्याची ही सेवा भरडवाडीतील घाडीगांवकर कुटुंबीय सांभाळतात.
45. घडशी –दर वर्षी नित्यनियमाने कराड, बारामतीहून घडशी मंडळी सनई, क्लॅरोनेट व तालवाद्य घेऊन येतात व पान-सुपारीचा कार्यक्रम आटोपेपर्यंत व नंतर देवीचा संचार असेपर्यंत वाद्य-वादनाची सेवा दररोज देतात.
46. टाळधारी – संचारासोबत टाळ वाजविण्याची ही सेवा कामतेकर (सोनार) करतात.
47. पालखीला पॉलिश – श्रींच्या पालखीला पॉलिश करण्याचे काम मेस्त्री बंधु करतात, जेणेकरुन त्यायोगे दरवर्षी पालखीची गरजेनुसार डागडुजी केली जाते.
48. कमळे आणणे – देवीच्या दररोजच्या पूजेसाठी दहिबाव (बागमळा) येथील तळ्यातून सकाळीच कमळे आणण्याची ही सेवा मेजारी कुटुंबीय सांभाळतात.
49. पंचारती ताटाचे काकडे वळणे व श्रींच्या पंचारती तबकात काकडे उडिदाच्या पीठात बसविण्याचे काम मेस्त्री कुटुंबिय करतात.
50. सिंह रंगवणे गायमुख रंगवणे हे काम देवळी मंडळी करतात.
51. श्रींची नवरात्रातील पुजेची भांडी घासणे तसेच श्रींच्या पंचारती ताटाला लागणारे उडीदाचे पीठ आणण्याचे काम पाटकर कुटुंबिय करतात.

वरीलपैकी श्रींचा पुजारी, आठ देवस्थानांचे (उपरोक्त उल्लेखानुसार) वहिवाटदार, मशाल, मृदंग, झांज, वाजंत्री या सेवा बारमाही आहेत.

पुराणिक, चोपदार, हुद्दा, मोरचिल, भोई, चौरी, अब्दागिर, हिलाल, छत्री, घाम पुसणे, शंख, निशाण, झेंडे या सेवा ज्या दिवशी पालखी चालू असते (चैत्र महिना, आश्विन पौर्णिमा ते कार्तिक पौर्णिमा आणि नवरात्र) त्या काळात चालू असतात. बाकी सर्व सेवा (बारमाही व अन्य) या केवळ नवरात्रोत्सवापुरत्या मर्यादित असतात. या सर्व सेवेक-याना नवरात्रोत्सवात त्यांच्या सेवेनुसार शिधा मिळतो.

वेबसाइटवर असणाऱ्या माहितीत काही त्रुटी किंवा कोणाचा उल्लेख राहिला असल्यास ते तात्काळ विश्वस्त मंडळाच्या निदर्शनास आणून द्यावी. तसेच कोणाचा नामोल्लेख करायचा राहून गेल्यास संस्थान दिलगीर आहे.